Хвала Хрысту!

Вядучая старонкі – Ружа Міхайлоўская

Якое гэта шчасце – мець сяброў, пасланых нам Богам! Будзь удзячны Богу за кожнага з iх. Напішы мне пра сваё сяброўства на  na-ty@list.ru.

Пасланыя да любові

АКТУАЛЬНА

Прачытала такую гісторыю…
Старэйшага клікалі Фрэнк, яму было дваццаць гадоў. Таго, хто маладзейшы, клікалі Тэд, яму было дзевятнаццаць. Яны заўсёды былі разам, сябравалі яшчэ са школы і вырашылі разам пайсці служыць у войска. Адыходзячы, далі сабе і сваім бацькам абяцанне, што будуць клапаціцца адзін пра другога. Ім пашанцавала – трапілі ў адзін батальён. Але хутка батальён паслалі на вайну. Гэта была жорсткая вайна, якая ішла ў пясках гарачай пустэльнi. Нейкі час Фрэнк і Тэд знаходзіліся ў лагеры пад абаронай авіяцыі,  але   прыйшоў загад наступаць на ворага. Салдаты ішлі ўсю ноч пад вогненным шквалам непрыяцеля. Раніцай батальён дабраўся да вёскі. Тэда не было. Фрэнк шукаў яго паўсюль: сярод жывых і мёртвых. Знайшоў яго імя ў спісе без вестак прапаўшых і адправіўся да камандзіра.
– Прашу дазволу адправіцца за сваім сябрам, – сказаў ён.
– Гэта вельмі небяспечна, – адказаў камандзір. – Я ўжо страціў твайго сябра, страчу і цябе; там страляюць. Фрэнк тэрмінова адбыў. Праз некалькi гадзін ён знайшоў Тэда смяротна параненым, узваліў яго на плечы… Фрэнка  паранiла шрапнэллю, але ён усё роўна дапоўз да сваіх.
– Ці варта было паміраць, каб выратаваць мёртвага? – крыкнуў яму камандзір.”Так, – прашаптаў Фрэнк, – таму што, перш чым памерці, Тэд мне сказаў: “Фрэнк, я ведаў, што ты прый-дзеш».
Мы абраныя Любоўю для любові. Мы пасланыя ў свет любіць адзін другога. Часам паводзім сябе так, быццам мы пасланыя для таго, каб ваяваць, змагацца, спрачацца і сварыцца адзін з адным. Але хрысціянін павінен ўсім сваім жыццём паказваць, што хрысціянства – гэта любоў да бліжніх. Тут Езус прамаўляе  яшчэ  адно Сваё вялікае адкрыццё. Калі мы спытаем Яго: «Якую любоў Ты лічыш самай моцнай?», Ён адкажа: «Няма большай любові, як калі хто пакладзе жыццё сваё за сяброў сваіх» (Ян 15, 13). Ён аддаў жыццё за сяброў сваіх, за цябе і за мяне… Шмат хто з нас кажа, каб мы любілі адзін аднаго, між тым, нашае ўласнае жыццё паказвае адваротнае. А Езус даў вучням запаведзь, якую Сам выканаў, падаўшы прыклад.
Як лiчыш, цi пачуеш ты калі-небудзь:“…я ведаў, што ты прыйдзеш”?..

Зараз пытанне: якую  якасць ты шануеш у сваім сябру?

ШЧЫРА    Яна Шумская (г. Магілёў, парафiя Унебаўзяцця Найсвяцейшай Панны Марыі): – Сапраўдны сябра – гэта той чалавек, які адчувае мяне і якога адчуваю я. Мы нейкім дзівам ведаем, што зараз на душы адно ў аднаго, і ведаем, якім чынам падтрымаць. Нават калі ён не ведае дакладна, што са мной, ён проста знаходзіцца побач у духоўным плане і падтрымлівае мяне малітвай. Калі ў нас абодвух усё добра, мы таксама праводзім час разам самым розным чынам. Разам нам утульна, мы давяраем адно аднаму, дзелімся думкамі, планамі, дапамагаем  парадай. І галоўнае, жадаем адно аднаму сапраўднага шчасця.

Дзянiс Сухавараў (г. Магiлеў, парафiя св. Антонiя): – Адкрытасць і шчырасць, бо гэта робіць нашыя размовы прыемнымі. Шанаванне прыватнасці для мяне важна, каб сябра не спрабаваў на сілу увайсці туды, пра што я яшчэ не гатовы распавесці. Памяць; прыемна, калі пра цябе памятаюць і цікавяцца табой. Шчодрасць;  важна, каб чалавек не быў сквапны. Здольнасць да жартаў і добрае пачуццё гумару.

Воля Качалка (г. Мiнск, парафiя Беззаганнага Зачацця Найсвяцейшай Панны Марыі): – Мае сябры –  вялікі Божы падарунак для мяне. Яны ўсе розныя, і ў кожным  цаню нешта сваё. Напрыклад, адныя людзі –  блізкія мне духоўна, я магу дзяліцца з імі духоўным вопытам, а яны – са мною, і гэтак мы ўзбагачаемся ўнутрана. Некаторыя сябры – гэта надзейныя людзі, на якіх можна палажыцца ў цяжкасцях. А некаторыя дарагія мне людзі – гэта тыя, каму я магу даверыцца як звычайная дзяўчына, якая кахае, весяліцца, упадае ў роспач, выбірае новую сукенку ці дурачыцца пры фотаздымках. Усе мае сябры розныя, але ўсіх іх люблю.

Наталля Закрэўская (г. Мiнск, парафiя св. Роха): – Для меня очень важно, чтобы мой друг был честным. Мог правдиво открыть мне глаза на вещи, которые мне кажутся нормальными, хотя таковыми не являются. С другой стороны, честности я ожидаю и в отношении поступков друга. Чтобы он ни сделал, я всегда готова услышать правду, какой бы она ни была.

Артыкулы, блiзкiя па сэнсу: