Хвала Хрысту!
У цябе атрымоўваецца, каб час для Госпада знаходзіць кожны дзень і каб нішто цябе не адцягвала, і ты змог засяродзіцца? Напішы мне пра гэта, калі ласка, на адрас Dialog-na-ty@tut.bу
Асабісты час з Богам
АКТУАЛЬНА
Як важна правільна расставіць прыярытэты ў сваім жыцці! Але як павінна гэта быць? Спачатку – Бог, потым – сям’я, штосьці яшчэ, а за ім – яшчэ нешта? Але ж бяда з прыярытэтамі ў тым, што непазбежна ўзнікае іерархія, піраміда. Калі паставіць Бога на самым версе яе, што гэта будзе значыць на самой справе? Колькі часу мы павінны будзем удзяліць Богу, перш чым зможам перайсці да астатніх паўсядзённых спраў? А можа, Бог не хоча атрымать толькі частку цябе і частку твайго жыцця? Нават калі б ты мог, а ты не можаш, аддаць Яму большую частку, то і гэта будзе не тое, чаго хоча Бог. Бог хоча цябе ўсяго, цалкам, у кожным імгненні твайго жыцця. Можа, Бог не хоча быць першым у спісе тваіх каштоўнасцей? Можа, Ён хоча быць у цэнтры ўсяго?! У цэнтры твайго асабістага жыцця.
Ён – Святло і хоча быць Святлом на працягу ўсяго твайго жыцця, на працягу кожнага дня. Твая сям’я і сябры, праца і адпачынак, твае хобі, думкі і ўчынкі, – каб усё было злучана ў Ім, каб Яго Святло зіхацела на кожным кроку ў тваім жыцці.
Каб пазнаць чалавека, патрабуецца час. Узгадай таго, адносіны з кім для цябе важныя. Каб даведацца пра гэтага чалавека па-сапраўднаму глыбока, табе спатрэбіўся час, ініцыятыва з твайго боку і імкненне. Зразумець, што ён перажывае і што шануе, за адным кубкам кавы было б немагчыма. Каб пазнаць чалавека, патрэбен час. Дзень за днём, размова за размовай.
Гэты працэс падобны да працэсу пазнання Бога. Мы пачынаем лепш пазнаваць Бога, маючы размовы з Ім дзень за днём.
У штодзённым жыцці, калі кожны дзень напоўнены справамі, абавязкамі і клопатамі, мы часта забываемся пра наш асабісты час з Богам. Мы захопленыя сямейнымі абавязкамі, працай, адносінамі з сябрамі, што прыводзіць да таго, што моманты пакланення і малітвы адсоўваюцца на іншы план.
Заўсёды памятай, што Бог прысутнічае паўсюль увесь час. У любы момант, калі ты будзеш гатовы сустрэцца з Ім, Ён будзе там. І па дарозе з працы, і раніцай, калі зварыў каву…
Без ціхага часу з Богам немагчыма справіцца з шумам свету. Варта знайсці час для Бога, каб пазнаць Яго, каб палюбіць Яго яшчэ мацней.
Пытанне: а ці знаходзіш ты час для Бога?
|
ШЧЫРА
Аксана Лапіцкая (г. Асіповічы, парафія Божай Міласэрнасці): – У штодзённым жыцці я заўсёды стараюся знайсці час для Бога, для мяне гэта асаблівы час. Бывае, што гэта толькі хвіліны, але яны ёсць. Гэта час, калі я магу пабыць з Богам, даверыць свае клопаты, цяжкасці, падзяліцца з Ім тым, што хвалюе. У апошні час для мяне, бывае, складана знайсці хвіліну для малітвы, бо калі ў цябе нарадзілася дзіця, ты стамляешся маральна і фізічна. І бывае, што абыхо-дзішся толькі кароткай малітвай, у якой дзякуеш Богу за ўсё, што маеш, за ўсе атрыманыя ласкі ад Яго. Бог дае сілы і цярпенне на ўсё. |
|
Кацярына Русялевіч (г. Гродна, парафія Святога Духа): – Не магу сказаць, што трымаю дысцыпліну і малюся кожны дзень. Звычайна сталай у мяне з’яўляецца толькі вечаровая малітва, і часамі ёсць якія-небудзь “бонусы”: святая Імша, ружанец, чытанне Святога Пісання. Калі збіраюся памаліцца ці пайсці да касцёла, то стараюся гэта зрабіць абавязкова. Але знайсці час для Бога нялёгка, бо ў нашых штодзённых абавязках звычайна забываемся пра Бога, ўспамінаем тады, калі трэба ўжо класціся спаць. Галоўнае, трэба памятаць, што Бог заўсёды побач і Ён наш сябар, і можна гаварыць з Ім нават падчас выканання сваіх абавязкаў, калі працуеш, гатуеш, вучышся. |
|
Анастасія Кардаш (г. Мінск, парафія Св. Яна Евангеліста і Св. Максіміль’яна Кольбэ): –Время для Бога… Порой его так трудно найти, ведь в какие-то моменты повседневности ты просто погружен в дела и работу, и кажется, что на остальное даже минуты не осталось… Но проходят годы и становится всё понятнее, что время для Бога – самое ценное, это главный пункт дня, ведь кто, если не Он, сможет понять меня, выслушать мою молитву и наполнить спокойствием, особенно в трудный момент! |
|
Станіслаў Сацкевіч (г. п. Ружаны, парафія Св. Тройцы): –Лічу сябе хрысціянінам, таму, канечне, маю час для Бога і гэта мой абавязак, уласнае жаданне і патрэба. Стараюся знайсці некалькі хвілін, гадзін для Яго – малітва, чытанне Бібліі, разважанне над Божым Словам і т.п. Абраз Езуса, які стаіць дома на бачным месцы, заўсёды нагадвае мне пра неабходнасць знайсці для Яго час. Бывае, цяжка гэта зрабіць, але час з Богам – гэта момант, калі адчуваеш блізкасць і бяспеку. Дыялог з Ім – гэта важны, цёплы, глыбокі, радасны, месцамі кранальны час. |
