Хвала Хрысту!

Вядучая старонкі – Ружа Міхайлоўская

Жыццё – гэта, вядома ж, выбар. Мы  выбіраем кожны дзень, кожную хвіліну, кожную секунду. Перад  намі адчыняюцца дзверы, нават  некалькі дзвярэй.  Нас часам ветліва запрашаюць,  маўляў,  зайходзьце,  знойдзеце  для сябе задавальненне… Але ці так яно? І якое задавальненне? .. Сапраўды, выбар  – за намі. Не забывайся пісаць мне на адрас: na-ty@list.ru.

Мая воля, мой выбар

АКТУАЛЬНА

”Любі – і рабі што хочаш”, –  сказаў Святы Аўгусцiн. Адчуваеш, якая моц, свабода і адказнасць стаяць за гэтымі словамі?  І няма ніякай спакусы. Любі Бога.  Любiць – значыць выбраць Яго. Выбраць Бога –  значыць даць увайсці  любові ў сваё жыццё – той самай любові, якая заўважае,  суправаджае цябе штодня, клапоціцца,  дапамагае пераадольваць цяжкасці,  вылечвае твае цялесныя і духоўныя раны прабачае і зноў… свеціць табе яскравай знічкаю.
У нашых сэрцах няма месца для двух царстваў. Адно з іх па-вінна пакінуць тваё сэрца, і гэта залежыць толькі ад волі і свабоднага выбару чалавека, які прымае гэтае самае важнае для сябе рашэнне.
Калісьці y інтэрнэце прачытала такое разважанне. ”Быць хрысціянінам – гэта крыху адрознівацца ад іншых. Гэта жыць побач з людзьмі, для якіх іх свет важней за ўсё іншае, у тым ліку і Хрыста. Быць хрысціянінам – гэта часам быць незразумелым за свой выбар, а калі цябе не разумеюць, то пасля ў большай ці меншай ступені становішся чужым. На гэта нялёгка пагадзіцца, бо заўсёды хочацца быць сваім”.
Есус  нагадвае  нам, што  вельмі  важна  пазнаць Таго, Якога  Ён  называе: ”Той, Хто паслаў Мяне”. Гэта  менавіта Той, знаёмства з  Якім тлумачыць усё, нават тлумачыць  рызыку стаць чужым. Гэта Бог, Які адкрывае перад людзьмі Сваю любоў  і такім чынам прыцягвае да Сябе. Калі чалавек пазнае Яго, свет пера-стае быць спакусай, а становіцца  шляхам  да  Бога.
Бог хоча, каб мы былі мэтанакіраванымi людзьмі. Ён не заклікаў нас быць ўвесь час чымсьці занятымі – Ён заклікаў нас прыносіць плён. Ён даў нам свабодную, вольную  волю, каб у кожнай сітуацыі мы маглі рабіць правільны выбар.
Лёгка згубіцца ў мітусні паўсядзённага  жыцця. Трэба часцей думаць пра тое, як ты праводзіш  свой час, на што яго траціш,  каб зразумець, ці прыносіш ты плён. Трэба часцей думаць, як  далёкія нашыя  ўчынкі ад  учынкаў  Хрыста?  Мы не здольныя жыць без Яго прыкладу. Прымаючы  рашэнні,  павінны пытацца ў сябе: ці будзе праслаўлена імя  Божае  ў  нашым выбары?
Няхай кожны дзень, чытаючы Слова Божае, мы будзем натхняцца  жыццём  нашага  Госпада, паступаючы так, як паступіў бы Ён.

А зараз адкажы на пытанні: які твой выбар? Ты ўжо зрабіў яго ці яшчэ збіраешся зрабіць? Што для цябе галоўнае?

ШЧЫРА    Анастасiя Пракопчык (г. Пружаны, парафiя Ўнебаўзяцця Найсвяцейшай Панны Марыi): – Мне здаецца, што галоўны выбар, перад якім чалавек стано-віцца штодня  i якi вызначае якасць яго жыцця, – гэта  «ці быць мне сёння шчаслівым?». I адсюль выходзіць шмат iншага: цi ўстаць бадзёра з ложка, цi пацалаваць мужа/жонку, цi ўсміхнуцца да калегi, ці забыць крыўду, цi паглядзець на цяжкую справу пазітыўна. Бог хоча бачыць нас шчаслiвымi i менавiта для гэтата нас стварыў! Таму выбар «быць шчаслiвым або не» iначай можна сфармуліраваць як «жыць так, як жадае мне Бог, ці інакш». І гэта  вырашае не толькi наша сённяшняе жыццё, але і нашую будучыню.

Ганна Кабышава (г. Асiповічы, парафiя Божай Мiласэрнасцi): – Самы галоўны выбар у жыцці – гэта выбар Пана Бога, Яго шляхоў для мяне, каб icцi за Iм, любіць, як Ён, давяраць Яму кожны дзень, кожную сітуацыю, кожны момант. Каб зрабіць гэты выбар, выбар Пана за свайго Госпада, трэба iмкнуцца пазнаць Яго сэрцам  i даверыць Яму выключна ўсё.

Мiкіта Лапушэк  (г. Гродна, парафія Ўзвышэння Святога Крыжа, Бэрнардыны): – Самы галоўны выбар чалавека ў сваім жыцці –  гэта выбар паміж дабром і злом. Кожны чалавек індывідуальны, але кожны хоча быць каханым, хоць  сам не заўсёды робіць добрыя справы і не заўсёды дапамагае бліжняму. У кожнага свой шлях у жыцці, і, каб рабіць выбар у тым ці  іншым выпадку, трэба свае думкі, сумненні, клопаты давяраць  Богу. Я лічу, што на першым месцы ў кожнага чалавека павінен быць Хрыстос, а на другім – каханне.

Юля Капусцiна  (в. Лебедзева, парафiя Найсвяцейшага Сэрца Езуса): – Кожны наш дзень – гэта выбар. Але самы галоўны выбар – гэта ці прамаўляю я сваiм жыццём да Бога. Цi выбіраю  Езуса сваім Панам і кіраўніком у змаганнi са штодзённымi цяжкасцямi i спакусамi. Цi ўмацоўваю веру i любоў да Бога ў сваiм сэрцы. Цi кіруе Дух Святы кожным крокам майго жыцця. Ці кожнае маё рашэнне згодна з Яго воляй. Гэта той асаблiвы выбар, якi дапамагае ў прыняццi як найбольш важных жыццёвых рашэнняў, так і мноства штодзённых дробязей, дапамагае  не згубiцца ў цемры, а жыць у праўдзе.

Артыкулы, блiзкiя па сэнсу: