Хвала Хрысту!
Калі ты адчуваеш у сваім сэрцы нешта негатыўнае, калі ў ім шмат сумніваў… З чым бы ты ні сутыкаўся – тваёй першай думкай павінна быць Слова Божае. Разважанні на гэтую тэму падрыхтаваў Аляксей Заічанка.
А ты не забывайся пісаць мне на Dialog-na-ty@tut.bу
Усё пройдзе,
але Яго Слова застанецца
АКТУАЛЬНА
“Неба і зямля мінуць, а словы Мае не мінуць” (Мк 13, 31)
Мы можам задацца пытаннем, дзе нам знайсці Яго Слова, якое не пройдзе? Яго Слова – у Святым Пісанні. Гэтае Слова Бога, яно ўнікальна для ўсіх, хто яго чытае, слухае, давярае яму, думае пра яго, хто прымае яго з любоўю. Яго Слова не застанецца нявыкананым, і дзякуючы свайму ўнікальнаму зместу, яно дае кожнаму моц і бяспеку вечнасці.
Бог прамаўляе ў цішыні. Таму варта знайсці і прысвяціць час для таго, каб чытаць і разважаць Святое Пісанне.
Святое Пісанне – гэта не проста кніга з пэўнай гісторыяй, чытаючы якую мы можам чамусьці навучыцца. Не! Святое Пісанне – гэта крыніца, праз якую Бог вядзе з намі дыялог, жадаючы дабра. У большай меры ад нас залежыць, прымем мы гэты дар ці не.
Бог праз натхнёных аўтараў паказвае нам, як ад пачатку стварэння Свету клапоціцца пра чалавека. На старонках кніг Старога Запавету мы заўважым, што быццё з Богам не заўсёды гарантуе лёгкае жыццё, як бы нам хацелася. Гэта шлях вернасці, выпрабаванняў і ўдасканальвання ў Духу Святым. Мы бачым, як праз розныя цяжкасці Бог вёў Выбраны народ з няволі ў Егіпце. Так і сёння – Бог хоча нашага збаўлення.
Святы Апостал Павел называе Слова Божае мячом духоўным (Эф 6, 17), бо «яно пранікае ажно да падзелу душы і духа, суставаў і шпіку і здольнае судзіць думкі і намеры сэрца» (Гбр 4, 12). Слова Божае з’яўляецца жывым і дзейсным, але толькі калі мы чытаем яго і адкрыты на Духа Святога. Святы Геранім, вядомы знаўца Бібліі, казаў: «Хто не ведае Святога Пісання, той не ведае Хрыста». Сапраўды, як мы, хрысціяне, можам верыць у Таго, каго не пазнаем?
Менавіта праз чытанне Святога Пісання мы можам больш пазнаваць Бога, а таксама праз гэта і пазнаць саміх сябе. Але пазнанне Бога патрабуе не толькі намаганняў нашага розуму, але таксама веры і Божай ласкі. «Таму вера – ад пачутага, а пачутае – праз слова Хрыста» (Рым 10, 17). Нашая вера ўзмацняецца ад Божага Слова. Чым больш мы паглыбляемся ў Слова Божае, тым больш даём Богу магчымасць узмацніць нашую веру. Слова Бога – слова, якое мае моц, ўладу, любоў і збаўленне. Яго Слова стала целам.
Мноства людзей на зямлі цытуюць Святое Пісанне на памяць, робяць розныя чэленджы, але пры гэтым самі не выконваюць Божыя загады. Галоўнае – не твае веды, важна, каб Слова стала часткай цябе.
А зараз пытанне: што асабіста табе дае чытанне Бібліі?
|
ШЧЫРА
Ірына Кухальская (г. Мінск, парафія Найсвяцейшай Тройцы): – Нейкі час я знаходжуся ў духоўным крызісе і маю складанасці з чытаннем Святога Пісання. Але спробы чытаць ці, часам, нават іх адсутнасць, даюць мне пэўныя веды пра мяне ж. Часта я чакаю ад сябе зашмат, а калі не атрымліваецца, то расчароўваюся і не хачу рухацца далей; не маю цярпення; забываюся, што не ўсё залежыць толькі ад мяне. Хоцьі балюча адкрываць непрыемнае пра сябе, але мяне гэта не палохае, хутчэй – заклікае скарыцца перад Госпадам, разабрацца са сваёй пыхай. Здавалася б, нічога пазітыўнага, але гэта дае мне надзею, што, адкрываючы праўду пра сябе, стану крыху бліжэй да Бога. |
|
Яна Алёкса (г. Астравец, парафія Святых Космы і Даміяна): – Яно дае мне магчымасць адкрыць вочы на гэты свет і знайсці адказы на пытанні, якія хвалююць дастаткова даўно. Заўсёды атрымоўваецца так, што адкрываеш Яго ў патрэбны момант, час, дзень і на патрэбным месцы. У ім можна знайсці сябе, убачыць і пачуць, што зрабіў той, у кім ты сябе знайшоў, а таксама, па магчымасці, выкарыстаць словы для вырашэння пэўных праблем ці пытанняў. Голас Бога заўсёды падкажа – дастаткова толькі прыслухацца да Яго, адчуць Яго і зразумець. |
|
Яна Шумская (г. Магілёў, парафія Ўнебаўзяцця Найсвяцейшай Панны Марыі): – Калі быць дысцыплінаваным у чытанні Бібліі, быць шчырым, адкрытым і, нарэшце, гатовым слухаць і чуць Бога, то Біблія становіцца часам нібыта «мэсенджар» або нейкі сродак прамой сувязі з Богам, праз які Ён адкрыта прамаўляе і адказвае на пытанні, якія мяне турбуюць. Толькі важна быць адкрытым і дысцыплінаваным і зрабіць штодзённы час чытання Бібліі святой гадзінай, на якую нельга спазняцца ці нейкім чынам губляць сканцэнтраванасць. І яшчэ. Біблія – гэта магчымасць спазнаваць Жывога Бога, бачыць, як Ён дзейнічаў у мінулым, каб ведаць Яго «почырк» і заўважаць Яго руку ў сваім жыцці. |
|
Марыя Краўцова (г. Гомель, парафія Нараджэння Найсвяцейшай Панны Марыі): – Священное Писание для меня – это способ узнать о Боге через Его пророков, чудеса, наказания и любовь. Учитывая, что в Библии не все так однозначно, возникает желание допытываться и изучать – почему так, а не иначе. Смотреть разные переводы и искать след Того, Кто так трепетно любит меня. Священное Писание – это про узнавание Бога. Священное Писание не раз помогало мне справляться с трудностями и давало понимание непростых ситуаций в жизни. |
